مرات كتير بتخلص (قصة) الحب، ولكن الحب نفسو ما بيخلص
بتمرق البداية والعقدة ورا العقدة ويمكن نلاقي الحل ومنحط نقطة النهاية، ومنسكّر الكتاب، لكن الحب مش عناصر بيألفو قصة او رواية او فيلم سينما
يمكن الحب يصير قصة يتناقلوها الناس، لكن بين الحبيبين فيه حب مش قصة
لأنو القصة مهما طولت بتخلص، لكن الحب مهما كان عمرو قصير ما بيخلص، متل طفل مات بعد ما خلق بشوي لأنو الهوا انقطع عنو
بس رح يضل هالطفل ساكن بقلب أهلو ولو جابوا ولاد غيرو، ولو انو ما بيحكوا عنو كتير…. ولو كانت قصتو زغيرة وقصيرة ونهايتها حزينة
الحب يللي بيساع الغضب والعتب والجدال والنقاش والمشاكل… وما حدا بيدير ضهرو وبيفل… هوي الحب.
الحب يللي بيتحمل الوجع والتعب والفقر والمرض. .. وما حدا بيفكر يقول: بيكفيني يللي فيي ومش ناقصني… هوي الحب.
الحب يللي بيحب الحركشة والمشاكسة والمزح واللعب وما حدا بيقول كبرنا ع هالحركات… هوي الحب.
الحب يللي ما فيه تربيح جميلة وتذكير دايم بالعطاءات وواجبات وحقوق ومواعيد محددة للشوق… هوي الحب.
الحب يللي ما بيخلّيك لحظة تفكّر تئزي حدا لأنو بيحمل مسؤولية كل يللي حولو… هوي الحب.
الحب يللي بيخلّيك تكتفي مرات بلقاء واحد، لكن بتعرف إنو هاللقاء كلو إلك وانت كلّك إلو… هوي الحب.
الحب يللي مهما كبرت بالعمر بترجع تتصرّف فيه متل المراهقين، وتحتفظ بالكيس يللي إجت فيه الهدية، وتنام مطرح ما علق العطر بالكنباية، وتقول لحالك: برغم كل شي الحياة حلوة… هوي الحب.
هيدا الحب فيكن إنتو تسمّوه (قصة) حب…
بس يللي عاشوه وعم يعيشوه بيعرفو إنو أجمل من أيا قصة.
#ماري_القصّيفي – ٢٠٢١
